Sjálfstýring á keppnisdegi

Veist þú nákvæmlega hvað þú ert að fara gera þegar það eru 73 mínútur í að þú ert að fara keppa? Og af hverju ætti það að skipta einhverju máli? Jú, ef þú vilt minnka áhyggjur og stress á keppnisdegi og auka sjálfstraust á sama tíma þá er mikilvægt að hafa dagskrána á keppnisdegi neglda niður

Lengi vel á mínum ferli var ég oft að leyfa óþarfa hugsunum að eyðileggja andlegan undirbúning á keppnisdegi. Ég man eins og það hefði gerst í gær þegar ég keppti á heimsmeistaramótinu í sundi árið 2015 og var að undribúa mig fyrir undanúrslitasundið í 200 bringu. Þetta var í fyrsta skipti sem ég komst í undanúrslit á stórmóti, eitthvað sem hausinn var víst ekki tilbúinn í. Eftir að hafa tekið mína venjulegu keppnisupphitum, þá fannst mér ég allt í einu þurfa á einhverju meira að halda og ákvað að taka gera lengri upphitun. Um leið og ég var búinn með auka upphitunina þá fór ég að hafa áhyggjur af því hvort ég hafði gert og mikið. Þetta var hugarástandið fyrir stærsta sundið á mínum ferli.

Besta leið til að minnka stress á keppnisdegi er einfaldlega að “slökkva” á heilanum og setja hann í sjálfstjórn (e. Autopilot) með því að fylgja skipulagðri dagskrá. Með því að undirbúa dagskrá, alveg frá því að þegar mætt er á keppnisstað og þar til keppni hefst, þá fækkarðu tækifærunum sem heilinn fær til þess að taka ákvarðanir, og þar með möguleikunum á efasendum og áhyggjum að ryðja sér til rúms. Áður fyrr spurði ég mig oft þegar stutt var í sundið mitt hvort ég hefði hitað upp nógu vel, eða hvort ég væri orðinn of kaldur og fleiri spurningar sem drógu sjálfstraustið niður.

Sem betur fer í dag, þá er ég með keppnisdagskrá sem ég fylgi eins vel og hægt er. Við vitum öll hvað okkur finnst þægilegt að gera fyrir keppni til að hámarka árangurinn okkar, og þannig byrjaði mín fyrsta keppnisdagskrá, ég einfaldlega skrifaði niður það sem mér fannst henta mér best að gera og fylgdi því. Dagskráin þarf samt að vera lifandi og hún má þróast eftir því sem við keppum oftar. Við áttum okkur kannski á því að við viljum skipta einhverjum hlut út fyrir einhvern annan. Ég er til dæmis búinn að vera þróa mína dagskrá í yfir þrjú ár og er enn þá að reyna finna hluti til að bæta.

Það mikilvægasta er að þetta sé rútína sem þér líður vel með að framkvæma og veist að undirbýr þig vel til að hámarka árangur. Það er einnig mikilvægt að vera ekki of vanafastur og þá fara í stresskast að geta ekki fylgt dagskránni A til Ö. Í dag lýtur keppnisrútinan mín svona út:

• 120 mín: mæta á keppnistað, setjast niður og slaka á. Skoða sig um og finna fyrir andrúmsloftinu

• 105 mín: rúlla og teygja á, drekka rauðrófusafa

• 90 mín: bakkaupphitun (skipulögð rútina, alltaf jafn löng)

• 70 mín: upphitun í sundlaug (skiptulögð rútina, alltaf jafn löng)

• 45 mín: klæða sig í keppnisfatnað og drekka pre-workout

• 30 mín: slappa af og hlusta á tónlist. Tala við þjálfara ef eitthvað þarf að ræða

• 20 mín: fara í keppnisherbergi

• 15 mín: léttar handa og fóta æfingar (koma smá blóðflæði í gang)

• 10 mín: hugleiðsla og svo slaka á þangað til keppni hefst

Með því að fylgja þessari dagskrá þarf ég ekki einu sinni að hugsa og hafa fyrir hlutunum, ég fylgist bara með hvað klukkan er og fer að gera næsta hlut. Áður en ég veit af komið að því að keppa og ég veit að ég er tilbúinn af því ég hef gert þá hluti sem undirbúa mig eins vel og hægt er. Að fylgja dagskrá gerir manni kleift að minnka stress og virkilega njóta þess að undirbúa sig fyrir keppni. Engar ákvarðanir þurfa að vera teknar og engar áhyggjur myndast. Það eina sem er eftir er að einfaldlega að keppa og hafa gaman.

Ert þú með dagskrá fyrir keppnisdag? Hvaða rútína hentar þér?

Growth Mindset Coaching

Book Now